Loron Di’ak, Loron Ksolok ba Antigu Alunos/as Dom Bosco Timor-Leste!

Ha'u haksolok tebes atu hato'o ita-nia moto sentrál ba Federação Nacional dos Antigos Alunos de Dom Bosco de Timor-Leste (FNAADB-TL) ba períodu ne’e mak “Return home” (Fila ba uma), ne’ebé refleta iha planu estratéjiku hitu Federasaun Mundiál nian no habelar ba programa 14 Federasaun Nasionál liuhusi rezultadu Kongresu Nasionál iha Fuiloro, Lautem, 21-23 Desembru 2018 .

Maluk Antigu Alunus/as, federasaun núdar mahon ba asosiasaun hotu ho objetivu atu akumula no hametin lasu fraternidade entre antigus alunus/as ne’ebé esperiénsia liuhusi formasaun iha kualkér Obra Pastorál Kongregasaun Salesiana hanesan eskola formál ka naun-formál, residénsia, eskola profesionál, ekipa juvenil, oratórianu/a nomós simpatizante sira. Ha’u fiar, obra Dom Bosco kontinua hafoun ita núdar Sidadaun Ida Ne’ebé Onestu no Fiar-Na’in Ne’ebé Di’ak.

Maluk Antigu Alunus/as Dom Bosco, ami-nia lideransa durante tinan-lima (2018-2023), ami sei re-define konseitu no plataforma servisu hamutuk família saleziana ba formasaun integrada foinsa’e sira. Agora, ita hahú daudaun ona planu estratéjiku dahuluk inklui intensifika konsolidasaun rede antigus alunus/as, estabelese kartaun ba antigu alunus/as idak-idak nomós estabelese ona rede sosiál Facebook no Website foun.

Ha’u ho federasaun nasionál nia naran, hakarak hato’o agradesimentu ba estrutura federasaun nasionál no asosiasaun sira, família saleziana hotu, sarani sira no lideransa estadu nian ne’ebé fó kontribuisaun maka’as hodi realiza programa federasaun nian ba kurtu-prazu ne’e. Ami he’in katak ita-nia konseitu no plataforma servisu hamutuk sei haboot tantu federasaun no asosiasaun sira iha futuru.

Mai ita hotu kontinua vizita federasaun-nia Facebook no Website hodi rejistu ita nia-an nomós asesu informasaun atuál ba formasaun sira iha futuru. Viva Dom Bosco! Viva Timor-Leste!

Komprimentus,

Alexandre F. Gusmão Freitas
Prezidente fnaadb-tl