Dili, 10 Novembru 2019 — Prezidente no vise eleitu ba Antigos Alunos Dom Bosco Asosiasaun Dili (AAADB-Dili) nian, Gualdino do Carmo da Silva, no Augusto Ferreira Soares ho estrutura tomak simu pose iha Kapela Centro Dom Bosco ba periódu tinan-lima. Sira nain-rua eleitu iha Kongresu ba dala-VI Antigo Alunos/as Asosiasaun Dom Bosco Dili nian ne’ebé realiza ba loron-rua entre 19 Outubru no 20 Outubru.
Prezidente AAADB-Dili nian, Gualdino do Carmo da Silva dehan programa imediata husi asosiasaun nian mak atu foku liu ba funsionamentu Kooperativa Belun Dom Bosco no konvida fali antigus alunos Dom Bosco hotu ne’ebé residensia iha Dili hodi envolve no investe iha Kooperativa ne’e ho objetivu klaru atu lori antigus alunos Dom Bosco hotu Fila mai Uma no hadi’ak ekonomia membru AADB-Dili nian.
Prezidente eleitu Antigos Alunos Asosiasaun Dom Bosco Dili nian, Gualdino (liman-loos dahuluk) ho estrutura tomak simu pose iha Kapela Dom Bosco Comoro. Foto: Amau-Uailili/fnaadb
“AAADB-Dili nia planu kurtu-prazu sei foku ba selebrasaun Loron Dom Bosco nian iha 31 Janeiru 2020, ami hahú halo planu atu selebra loron ne’e liuhusi aktividade desportivu ba foinsa’e sira no halibur fali antigos alunos hotu ne’ebé rezidensia iha Dili nomós promove Dom Bosco ba sosiedade Munisípiu Dili nian”, Gualdino dehan.
Prezidente AAADB-Dili énfaze katak sira-nia estrutura sei rejistu Antigos Alunos Dom Bosco ne’ebé rezidente iha Dili atu asosiasaun bele hatene númeru antigos alunos sira nu’udar forsa no ekipa asosiasaun nian, nomós atu define eventu rutina ne’ebé sei halo. Ne’e planu ne’ebé sira traza iha fulan-tolu dahuluk ba sira-nia mandatu.
Estrutura tomak AAADB-Dili foto hamutuk liutiha pose iha Kapela Dom Bosco Comoro. Foto: Amau-Uailili/fnaadb
Prezidente interinu sesante AAADB-Dili nian, Abrão Pereira dehan durante fulan-neen nu’udar interinu, nia programa mak hala’o atividade sosiál hanesan limpeza jerál, vizita antigos alunos ne’ebé sai prizoneiru, no hala’o programa federasaun nian hodi konvida antigos alunos atu Fila mai Uma no Fila ba Dom Bosco.
“Programa estraordináriu atu dada foinsa’e sira hodi koñese Dom Bosco mak realiza kompetisaun desportu. Ita tenke halo planu didi’ak ba asuntu ne’e atu absorve talentu foinsa’e nian, no ha’u fiar katak prezidente no vise foun sei akomoda iha sira-nia planu atividade ba loron atus-ida”, Abrão dehan
Nia dehan dezafiu espesifiku durante nia mandatu interinu mak nia seidauk identifika no rejistu hotu Antigos Alunos Dom Bosco ne’ebé rezidente iha Munisípiu Dili. Nia fiar katak antigos alunos hotu iha Dili sei Fila mai Uma, Fila ba Dom Bosco atu kontribui ba planu, aktividade prezidente no vise foun nian.
Estrutura foun AAADB-Dili nia programa durante tinan-lima sei foku ba hakle'an vida espirituál antigos alunos, haree ba vida ekonomia membru liuhusi kooperativa, no asosiasaun Dili sei trata foinsa’e sira ohin loron hanesan oportunidade, la’os fontes ba problema sira liuhusi fornesimentu ba formasaun téknika vokasionál iha Sentru Formasaun Kaza Saleziana sira, nune’e sira sei sai foinsa’e ne’ebé util ba kreda no nasaun.
